Во октомври голем концерт во чест на Тоше на Градски

by najforumce Саб Мар 15 2008, 17:49

Голем меѓународен концерт со гостувања на многу популарни домашни и странски пејачи во чест на Тоше Проески ќе се случува во октомври на местото на кое трагично загинатата македонска и балканска пејачка ѕвезда го одржа својот последен настап пред домашната публика на 5 октомври 2007 година - Градски стадион.

Членовите на Координативното тело за заштита на ликот и делото на Тоше Проески ќе се состанат идниот вторник, а на состанокот ќе бидат утврдени деталите околу организацијата, листата на пејачи и прецизниот термин на одржување на концертот. „Концертот произлезе како заклучок на Владата, а идејата за негова организација ја прифати и семејството“, не' информираше Елизабета Канчевска-Милевска, државeн секретар во Министерството за култура и член на Координативното тело.

Координативното тело завчера доцна попладне го одржа својот последен состанок на кој беше констатирано дека меѓународниот конкурс за идејното решение на спомен-куќата на Тоше Проески во Крушево е завршен, а во тек е формирање жири-комисија во која, покрај членовите на семејството Проески, ќе има еден меѓународен член. „До овој момент се пристигнати осум идејни решенија од земјава, а во наредните денови очекуваме да стасаат и од странство. Досега беа подигнати 20 апликации“, вели Канчевска-Милевска.

Како што се најавува, во текот на месецов Министерството за транспорт и врски ќе почне со изградба на патот од Крушево до манастирот „Свето Преображение“, а истовремено објектот ќе биде обезбеден и со струја.

Координативното тело за заштита на ликот и делото на Тоше Проески преку информација до Владата се заложи и за отстапување простор за работа на Фондацијата „Тоше Проески“ во Скопје.