Последна рунда преговори за името во Њујорк

Последната рунда преговори за разликите околу името, која започна попладнево по македонско време во Њујорк, би можела, но и не мора да го даде финалниот одговор дали се гледа крајот на грчко-македонскиот спор и дали Македонија ќе добие покана за влез во НАТО.

Извори во ОН неофицијално најавуваат дека оваа рунда разговори би можела да биде суштинска и да продолжи во сабота.

Според последните информации, и двајцата преговарачи ќе бидат во постојан контакт со своите влади во Скопје и Атина и ќе можат директно да реагираат на сите прифатливи, но и на предлозите кои се спротивни на нивните позиции.

И покрај првичната најава дека Нимиц и преговарачите ќе се воздржат од давање изјави за време и по средбата, за да се избегне притисокот од јавноста, сепак неофицијално се дознава дека медијаторот доцна вечерва или утре наутро би можел да брифира за развојот на настаните.

Преговорите очигледно влегоа во критична фаза откако македонската Влада, по првичните позитивни реакции за дел од последните предлози на Нимиц, објави дека ништо освен двојната формула не доаѓа в предвид, а грчките политички партии донесоа консензус да се стави вето доколку нема само едно сложено име.Сепак, рано е да се каже дали двете страни навистина имаат тврди преговарачки позиции или сето тоа е дел од дипломатската игра која се води веќе 16 години.

Песимизам за можноста деновиве во Њујорк да се најде решение и во американскиот Стејт Департмент. Портпаролот на Министерството за надворешни работи на САД, Том Кејси, смета дека во моментов преговорите се се уште далеку од решение.


„Сакаме да ги охрабриме грчката и македонската Влада да ги разгледаат поволните предлози на господинот Нимиц, за да се дојде до взаемно прифатливо решение во врска со спорот за името. Грција е важен пријател и НАТО-сојузник на САД“, изјави Том Кејси, портпарол на МНР на САД.

„Имаме и добри односи со Владата на Македонија и мислиме дека ова прашање е важно за двете земји и затоа се надеваме дека ќе најдат решение во ОН и преку господинот Нимиц да дојдат до решение“, додаде Кејси.

Извори блиски на преговарачкиот процес велат дека разговорите меѓу Македонија и Грција се една од најтешките дипломатски мисии на Нимиц,не само во последниве девет години, откога од страна на ОН е назначен за специјален пратеник во спорот за името, туку и во целата негова тридецениска кариера.Димитров и Василакис на средбата со медијаторот Нимиц влегоа со цврсти позиции дека ништо не може да го промени македонското уставно име и дека Грција нема да прифати ништо помалку од едно сложено име за Република Македонија.