Македонија победи за Тоше

Тоше... Тоше... Тоше... Еден е Тоше... Ечеа завчера трибините на Градски на натпреварот Македонија - Андора, кој фудбалерите му го посветија на прерано загинатиот музички великан Тоше Проески.

Победа од 3-0, емотивно празнење, радост, но истовремено и неизмерна тага. Повеќе од 20.000 спортски срца го преполнија нашиот најголем стадион да му оддадат последна почит на Тоше.

Најверните навивачи од западната трибина со свеќи во рацете, а сите останати со високо подигнати фотографии со неговиот лик го поздравуваа прерано загинатиот музички идол. Фудбалерите најавија победа, го одржаа зборот и комплетно му ја посветија играта на музичкиот јунак.