Магија на Пандев. Нема да биде погрешно или нескромно ако речеме дека Горан Пандев му донесе победа на Интер од 2:0 во градското дерби со Милан.

Асистент на првиот, стрелец на вториот гол, веќе во првото миланско дерби се потпиша како херој.

Иако на теренот беше само 66 минути најдобриот македонски фудбалер одигра непроценлива улога во најславното градско дерби во светот.

Една минута пред да ја напушти играта постигна прекрасен евро-гол од слободен удар, втор за италијанскиот шампион на средбата.

Погодокот беше дополнително значаен бидејќи Интер од 26-тата минута играше без исклучениот Снајдер.

Водството дојде уште порано, во 10-тата минута кога Пандев со дијагонала од центарот на игралиштето го проигра истурениот Милито кој го совлада Дида.

Во судиското продолжение дербито доби на напнатост кога Цезар го одбрани ударот од белата точка на Роналдињо, веднаш откако Лусио доби втор жолт картон за игра со рака во шеснаесетникот.

Во четвртиот настап Пандев го постигна вториот гол за Интер.