7 октомври, (Нетпрес) - Српската фолк пејачка Цеца Ражњатовиќ, некогашна претседателка на фудбалскиот клуб Обилиќ, го оштетила клубот за 22,5 милиони марки и 480.000 долари преку трансфер на фудбалери. Во истрагата против неа, најмногу докази имало во случајот на тројца играчи, пишува “Блиц“ повикувајќи се на извори блиски на истрагата.



Документација за продажба на Никола Лазетиќ во турскиот клуб Фенербахче стигнала во Окружниот суд во Белград пред три дена. Портпаролката на судот Ивана Рамиќ, изјавила дека досега кај нив пристигнала пишаната документација од Франција, Бугарија и Турција, а се очекувала од Австрија, Грција и Русија.

Окружното обвинителство во Белград ланската година по шестмесечно размислување за подигнување на обвинение против Ражњатовиќ, повторно му предложило на судот да ја дополни истрагата против неа, пишува “Блиц“.

Истрагата против вдовицата на Жељко Ражњатовиќ, Аркан започнала во 2003 година, после акција Сабја. Два месеци пејачката поминала во притвор. И нејзината сестра Лидија Величковиќ била осомничена дека и помагала во нелегалните трансакции.