Новата 2009 година ќе мора да „почека“

Новата 2009 година ќе мора да „почека“ една секунда пред и официјално да пристигне, соопштија меѓународните експерти за времето.



Според експертите, на крајот на оваа година ќе биде додадена уште една „престапна“ секунда, со цел да се постигне синхронизација на службените атомски часовници со ротацијата на Земјата.

Иако ротацијата на Земјата трае цели 24 часа, мали варијации можат да доведат до расчекор меѓу астрономското време и она што го покажуваат атомските часовници, кај кои немаат никакви отстапки.

Ова ќе биде 24-то усогласување на времето од 1972 година што го спроведува Меѓународната служба за следење на ротацијата на Земјата, со седиште во Париз. Последното усогласување беше на преминот од 2005 во 2006 година.

Со дополнителната секунда, престапната 2008 ќе биде најдолга година по 1992-та.

Историски, времето се базира на ротација на Земјата околу Сонцето. Земјата прави една ротација околу Сонцето за приближно 365,2422 дена, поради што на секоја четврта, т.н. престапна година, се додава по еден ден во февруари за да се обезбеди усогласеност на календарската со астрономската година.