Писма до Господ

Верниците комуницираат со Бога низ молитва, но некои од нив се одлучуваат да му пишат и писмо.

Господ има свое поштенско сандаче и своја адреса на која илјадници верници секоја година праќаат писма и го молат за помош.



Се што треба да направите е на писмото да напишете „За Господ, Ерусалим“. Поштарот, согласно меѓународното право е обврзан да го испрати до ерусалимската канцеларија за недоставени писма, која се справува со пристигнатата пошта.

Вработените во овој оддел на поштата го отвораат секое писмо адресирано до Бога и внимателно го свиткуваат пред да го стават во пукнатините на најсветото ерусалимско место, Ѕидот на плачот. Ова место, кое исто така е познато како Западниот ѕид, или израелски Котел, е последниот остаток од храмот на кралот Давид.

Раководителот на канцеларијата за недоставени писма, Ави Јанив, смета дека Ѕидот на плачот е единственото место на Земјата каде што луѓето можат најмногу да му се приближат на Бога.

- Добиваме писма адресирани до Господ, а бидејќи немаме друга адреса освен Ѕидот на плачот, решивме таму да ги ставаме, вели Јанив.

Во ерусалимската канцеларија за недоставена пошта пристигаат писма адресирани и до Исус Христос, Дева Марија и Кралот Давид, но главниот рабин кај Ѕидот на плачот дозволува да се достават само оние писма кои се адресирани до Господ.

Сите кои испраќаат писма до Господ имаат една заедничка работа, сите сакаат нешто од Бога. Досега се регистрирани повеќе интересни барања. Еден човек ги испратил своите лото бројки, надевајќи се дека Господ може да му помогне, а друга пак жена од Русија го моли Бога да и‘ помогне да стане славна холивудска актерка.

- Луѓето бараат најразлични работи од Господ, но минатиот месец најдов писмо од човек кој не бараше ништо. Тој само му се заблагодари на Бога за тоа што го има, добрата сопруга, убавата куќа и добрата работа, вели Јанив.