Една година непребол за Тоше

by najforumce Чет Окт 16 2008, 01:18

Точно пред една година во магливо утро на автопатот кај Нова Градишка згасна животот на македонската поп икона Тоше Проески. Веста за неговото загинување молскавично се рашири и го зави во црно целиот Балкан.

Момчето со ангелски глас и љубов за сите потекна од скромно и честито семејство од Крушево кое уште од најрани години му ги всади вистинските вредности кои го водеа низ целиот живот. Тоше ги имаше сите атрибути да биде ѕвезда:вокал, одамна нечуен на овие простори, харизма, прекрасни топли очи полни сољубов, огромно хумано срце отворено за сите и пред се верба во Бога. Беше голем затоа што за неговите дела во најголем дел разбравме по неговата смрт, затоа што за тоа знаеја само тие на кои им помогнал, што е одлика само на големите луѓе. Неговата музика преполна со емоции допре до срцата на милиони луѓе и сите го чувствуваа како свој. Затоа и огромна беше болката од неговото заминување затоа што многумина почувствуваа дека загубиле некој најблизок.

Една година непребол за Тоше Sveki_10

Во целата измината година ниту еден ден не помина неговите фанови да не го посетат неговиот гроб во Крушево. Постојано и на сите канали од балканските телевизии се вртеа неговите песни. Неговата менаџерка Лилјана Петровиќ која изјави дека до крајот на својот живот ќе остане само негова менаџерка се посвети на зачувување на неговиот лик и исполнување на неговите неисполнети желби.За 27-миот роденден му купи гитара која му ја ветила, а заедно со неговиот англиски продуцент Енди Рајт го подготвува издавањето на неговиот англиски албум од кој веќе беше пуштен синглот The hardest thing.

Една година непребол за Тоше Tosse_10

На годишнината од неговиот последен концерт одржан во Скопје на Градскиот стадион се одржа концерт во негова чест насловен како Тоше, те сакаме сите. На концертот беа исполнети уште две негови желби: Градски беше полн како никогаш дотогаш, 40 000 луѓе направија ѕвездено небо само за него и беше промовиран неговиот дует со внукот Кристијан.

Една година непребол за Тоше Zv_neb10

Во меѓувреме беше формирана фондацијата „Тоше Проески“, се собраа многу донации за довршување на обновата на манастирот„Свето преображение“ што беше негова животна желба, а со донација на владата на Македонија се изгради и патот до манастирот. Неговиот живот и музика секојдневно се инспирација за многу луѓе. Направи толку многу за своите 26 години живот, ги достигна небесните височини затоа што беше ангел и затоа што само небото е граница за него...