Кошаркарите се пласираа на Европското првенство, Македонија слави

by najforumce Нед Сеп 21 2008, 04:39

Македонската кошаркарска репрезентација оствари голем успех, откако по вечерашната победа над Естонија со 87:75 го потврди учеството на Европското првенство во Полска кое ќе се одржи следната 2009 година и тоа како првопласирана во квалификациската група "Б", што носи привилегии при ждребот на групите за континенталниот шампионат.

За пласман ни беше потребна победа над Естонија, но победата на Португалија над нашиот директен конкурент за првото место во групата Б, селекцијата на Летонија ни овозможи поповолен жреб за групите во Полска.

Македонските кошаркари со верба во својот квалитет и на крилјата на еуфоричната публика во преполната сала "Борис Трајковски", одлично го започнаа натпреварот, а водството го имаа во текот на целиот натпревар, кое во еден момент изнесуваше и 29.

Најпрецизен во нашиот тим на денешниот натпревар беше Тодор Гечевски со 18 постигнати поени, Антиќ зад своето име запиша 16 поени. Во противничкиот тим Кенгур постигна 19.

"Победата на Португалија над Летонија ни даде дополнителна мотивација и шанса која не смеевме да ја пропуштиме. Го остваривме она што ни беше зацртано пред квалификациите - се пласиравме на Европското првенство. Имаме квалитет, тоа и го докажавме, а со максимално ангажирана работа од сите инволвирани страни можеме и да напредуваме во пресрет на евопскиот шампионат." - изјави капитенот Врбица Стефанов по натпреварот.

"Во квалификацискиот циклус одигравме најдобро што можевме во моментов. Не би можел да прогнозирам што ќе се случува на ЕП во Полска, бидејќи разврската е условена од многу причина, како извлекувањето на групите, составот на противниците и слично, но знам дека јас и играчите ќе го дадеме максимумот, па таму ќе видиме кој е кој." - изјави меѓу другото селекторот на македонската кошаркарска селекција, Јовица Арсиќ.

Со четирите победи во квалификациската група Македонија се пласираше на континенталниот шампионат во Полска, со што ќе настапи на едно ЕП по пауза од 10 години, откако последен пат учествувавме на првенството во Франција во 1999 година.

Извор: NetPress